MAMBO 7 YA KUFANYA IKIWA MAFANIKIO YAKO YAMEFUNGWA NA NGUVU ZA GIZA.

Tangazo

 

MAMBO 7 YA KUFANYA IKIWA MAFANIKIO YAKO YAMEFUNGWA NA NGUVU ZA GIZA.

Kuna njia nyingi za kukwambia kuwa mafanikio yako yamefungwa na nguvu za giza. Njia mojawapo ni Roho Mtakatifu kukupa mafunuo ya kiini cha kutokufanikiwa kwako kimaisha. Anaweza kukuambia kwa njia kama ya ndoto, maono, huzuni au kukosa amani. Siyo wengi wanajua kutumia huzuni au kukosa amani kama sauti ya Roho Mtakatifu juu ya maisha yao [angalia maandiko yanasemaje]. Pia Mungu hutuma neno lililobeba sauti itayokuambia itakayokuambia chanzo ni nini ili upone (Zaburi 107:20). Lakini unahitaji uwe na masikio ya kusikia ili uweze kusikia sauti hiyo. Wengi huwa wanashindwa kuisikia hii sauti.

1. KUMPA BWANA YESU MAISHA YAKO

Hiki ni kipengele muhimu sana kwa mtu anayetaka kutembea kuishi sawa na kusudi la Mungu. Kuokoka ni kumpokea Yesu kama Bwana na Mwokozi wa maisha yako. Pia mwamini Yesu kama Mfalme wa wafalme (Ufunuo 19:16). Unapookoka, ya kale yanapita na unakua kiumbe kipya (2 Warorintho 5:17). Ukiokoka Mungu anayatupilia mbali maovu yako yote (Mika 7:19) na hakumbuki tena dhambi zako (Isaya 43:25).

Lakini mtu kama hajaokoka Roho wa Mungu anakuwa hayupo ndani yake na kibiblia mtu huyo anakuwa amekufa (Yakobo 2:26). Biblia inazumgumzia juu ya kufufuliwa pamoja na Kristo (Waefeso 2:6). Huwezi kufufuliwa kama hujafa. Maandiko yanasema “Mauti na Kuzimu zikatupwa katika lile ziwa la moto. Hii ndiyo mauti ya pili, yaani hilo ziwa la moto. Na iwapo mtu ye yote hakuonekana ameandikwa katika kitabu cha uzima, alitupwa katika lile ziwa la moto” (Ufunuo 20:14—15). Je mauti ya kwanza ni ipi?

Nimekuonesha mistari hiyo makusudi kwani mtu kama hajaokoka kuna vitu Mungu hawezi kukupa katika maisha yao. Lakini ukiwa na Yesu unakuwa mtoto wa Mungu na Roho Mtakatifu anashuhudia pamoja na roho yako (Warumi 8:16).  Unapokuwa mtoto wa Mungu, unaingizwa kwenye agano na Mungu lenye muhuri wa Roho Mtakatifu na unapewa kurithi pamoja na Kristo katika ulimwengu wa roho. Yesu anakutoa kutoka katika ufalme wa giza kwenda ufalme wa Mwana wa pendo lake (Wakolosai 1:13).

Unapokuwa ndani ya agano hili, baraka zote za rohoni unapewa (Waefeso 1:3). Lakini kumbuka kupewa baraka na kutembea ndani ya baraka ni vitu viwili tofauti. Siyo kila aliyepewa baraka anazifaidi. Yakobo alikuwa ndani ya baraka za agano lakini Yusufu akaondoka nazo kwenda Misri. Mungu akabariki nyumba ya akida kule Misri badala ya Yakobo aliyeko ndani ya agano. Kuna baraka za kiagano katika Kristo Yesu ambazo huwezi kuzipata mpaka uwe mtoto wa Mungu. Ukiwa mtoto wa Mungu, Roho Mtakatifu anaingia ndani yako na kukufunulia maandiko (Yohana 14:26). Na Roho huyu anakupa macho ya kuona chimbuko la kutokufanikiwa kwako kimaisha.

2. FAHAMU WAPI UMEFUNGWA

Huwezi kujifungua kutoka kwenye kifungo ambacho hukijui. Na huwezi kujua kilichokufunga kama huijui sheria iliyokufunga katika ulimwengu wa roho. Na huwezi kujifungua kama hujui sheria inayoweza kuitangua ile sheria iliyokufunga katika ulimwengu wa roho. Na huwezi kujifungua kama hujui kipengele au vipengele vilivyoko katika ile sheria ambayo shetani ametumia kufunga mafanikio yako. Lakini je, utaijuaje sheria iliyokufunga?

Ili uweze kuijua sheria hii, lazima uwe na neno la Kristo. Kumbuka “imani chanzo chake ni kusikia. Na kusikia huja kwa neno la Kristo” (Warumi 10:17). Sauti ya Neno la Kristo ndiyo inakupa mafunuo ya kujua eneo au maeneo ambayo umefungwa katika ulimwengu wa roho. Kama huna neno, Mungu anaweza kukuambia kifungo chako kilipo lakini usielewe au usisikie wakati anasema nawe. Hivyo ili uweze kukijua kifungo chako kilipo, lazima uwe na maarifa ya neno la Kristo.

3. TOBA

Ukishajua vifungo vyako vilipo, fanya toba thabiti itayokufungua kutoka kwenye vifungo hivyo. Kushindwa kufanya toba kunaweza kukufanya uendelee kuishi katika kifungo hicho. Lakini je ni toba ipi ambayo unatakiwa uifanye katika kifungo fulani? Utajuaje kama Mungu amekubali toba yako? Ukisoma habari za wana wa Israel walipoabudu miungu mingine utaona kuwa ilimgarimu Musa toba za 4. Pia soma habari za Gidion katika kitabu cha Waamuzi. Wakati mwingine inakulazimu ufunge na kuomba ili uweze kufunguliwa (Matayo 17:21). Je utajuaje toba ambayo lazima ufunge na kuomba?

Kumbuka Damu ya Yesu inanena mema (Waebrania12:24). [Waebrania 9:11—27 inaeleza zaidi juu ya damu ya Yesu]. Damu ya Yesu ni damu pekee inayofuta maagano pamoja na sahihi za mashahidi wa kipepo katika ulimwengu wa roho. Damu ya Yesu ikishafuta [toba yako imepokelewa], shetani anakosa uhalali wa kushikiria mafanikio yako. Lakini hii haina maana huwezi kufungwa tena maeneo mengine. Kumbuka toba inakurudisha tena kwa Mungu. “Nao watakuwa watu wangu, nami nitakuwa Mungu wao” (Yeremia 32:38).

 

 

4. RUDISHA MAFANIKIO YAKO

Toba yako ikishakubaliwa mbele za Mungu, milango ya mafanikio yako inafunguliwa tena. Unaweza kurudishiwa mafanikio yote ambayo shetani alikuwa ameyafunga katika maisha yako. “Nami nitawaruishia hiyo miaka iliyoliwa na nzige” (Yoeli 2:25).

Lakini je utawezaje kurudisha mafanikio yako? Napoongelea “mafanikio” siongelei kupata hera, kupata kazi fulani, au kuwa na elimu fulani. Nazungumzia kutenda kusudi katika maisha yako ili kuujenga ufalme wa mbinguni. Hivyo unatakiwa kuomba Mungu ili akufunulie nini kusudi la maisha yako. Haya ni maombi muhimu kwa kila aaminie. Lakini je unaombaje ili ujue kusudi lako katika maisha yako? Utajuaje kama maono uliyonayo ni maono ya Mungu au maono yako?

Kumbuka unapokuwa unaomba, siyo kila sauti utayoisikia inatoka kwa Mungu. Wakati mwingine unapoenda kuomba na shetani naye anakuwepo. “Ilikuwa siku moja ambayo hao wana wa Mungu walikwenda kujihudhurisha mbele za BWANA, Shetani naye akaenda kati yao” (Ayubu 1:6). Shetani anaweza akafanya usisikie maono Mungu anakuambia juu ya maisha yako. Badala yake ukaisikia sauti ya shetani ukidhani ni sauti ya Mungu. Kama sauti siyo ya Mungu, utakosa amani katika moyo wako kwa njia ya utofauti. Ndo maana ni muhimu sana kila unapokosa amani kujua sababu.

Lakini ukiwa na neno, Mungu atakuelekeza wapi pana mafanikio aliyokukusudia na utaisikia sauti yake. Kumbuka mafanikio yako hayategemi maono uliyo nayo na wala hayategemei maono ya mtu mwingine juu yako. Mafanikio yako yanategemea maono ya Mungu katika maisha yako. JE UNAYAJUA MAONO YA MUNGU KATIKA MAISHA YAKO? [Hakikisha jibu la swali hili ni ndio]. Mungu alimwambia Isaka asiende Misri na kuwa atambariki mahali alipo (Mwanzo 26:2—3). Wengi wanadhani mikoa au maeneo fulani ndo kuna mafanikio. Muulize kwanza Mungu kwani unaweza kwenda Misri na kuacha baraka zako ulipotoka.

5. FUNGA MLANGO WA ADUI ASIKUVAMIE TENA

Ukisharudisha mafanikio yako, hakikisha unafunga milango yote ya adui katika ulimwengu wa roho ili nzige wasirudi kula ghala yako. Unafunga mlango wa adui na kumkabidhi BWANA awe mmiliki wa kila ulichonacho. Ukimpa Yesu amiliki kila kitu, adui hawezi kukushinda. Mungu atawatupilia nje adui zako wote  (Sefania 3:15).

Kushindwa kufunga mlango wa adui kunaweza kukusababishia kukwama tena kimaisha na kuwa na hali mbaya zaidi ya ile ya mwanzo. Hujawahi kuona mtu anafilisika halafu baadae anafanikiwa kimaisha. Halafu baada ya muda anafilisika tena na anakuwa na hali mbaya zaidi ya mwanzo. Unadhani tatizo linaweza kuwa nini? Moja ya sababu inaweza kuwa kushindwa kufunga mlango wa adui. Je unafungaje mlango wa adui katika ulimwengu wa roho na adui asiweze kuufungua tena?

6. TENDA MAPENZI YA MUNGU

Ni muhimu sana kuishi maisha ya kumpendeza Mungu ili kuhakikisha kuwa hurudi kwenye hali yako ya kutofanikiwa. Kuishi katika dhambi kunaweza kukusababisha ukwame tena kimaisha hata kama ulikuwa tayari umeshanguliwa. Yesu baada ya kumponya yule mtu aliyekuwa hawezi kwa miaka 38 (Yohana 5:5—9) alimwam

bia: “usitende dhambi tena, lisije likakupata jambo lililo baya zaidi” (Yohana 5:14).

Unapofunguliwa kutoka kwenye vifungo vya giza, kuendelea kuishi maisha ya dhambi kunaweza kukurudishia mapepo wabaya zaidi ili wakukwamishe kimaisha zaidi ya mwanzo. “Pepo mchafu, amtokapo mtu, hupitia mahali pasipo maji akitafuta  mahali pa kupumzika, asipate. Halafu husema, Nitarudi nyumbani kwangu nilikotoka; hata akija aiona tupu, imefagiliwa, na kupambwa. Mara huenda, akawachukua pamoja naye pepo wengine saba walio waovu kuliko yeye mwenyewe, nao huingia na kukaa humo; na mtu yule hali yake ya mwisho huwa mbaya kuliko ya kwanza” (Matayo 12:43—45). Kwa nini huyu pepo awalete pepo 7? Kumbuka 7 na namba ya utimilifu katika ulimwengu wa roho hivyo unaweza kuelewa kitachotokea.

Hivyo dhambi ni ufunguo shetani anautumia ili kuharibu zaidi mafanikio yako. “Kwa maana wale waliokwisha kuyakimbia machafu ya dunia kwa kumjua Bwana na Mwokozi Yesu Kristo, kama wakinaswa tena na kushindwa, hali yao ya mwisho imekuwa mbaya kuliko ile ya kwanza” (2 Peter 2:20).

7. MZALIE MUNGU MATUNDA

Mungu akikurudishia mafanikio yako na ukayatenda mapenzi yake, lazima utamzalia matunda. Mungu anatutambua kwa matunda yetu (Mayato 7:16). Ukiona bado unashindwa kumzalia Mungu matunda, yamkini bado unaishi nje ya kusudi la Mungu. Kipimo cha mafanikio yako kipo kwenye mavuno siyo kwenye mbegu wala kwenye eneo unalopanda. Kiasi cha mavuno uvunayo hakitegemei kiasi cha mbegu uliyopanda; wala hakitegemei kile unachotegemea kuvuna. “Mmepanda mbegu nyingi, lakini mkavuna kidogo; mnakula lakini hamshibi… Mlitazamia vingi, kumbe vikatokea vichache” (Haggai 1:6,9). Hivyo matunda yako yawe kipimo kujua kama unatembea katika nafasi Mungu aliyokupa katika ulimwengu wa roho ili kuujenga ufalme wa mbinguni.

Je utajuaje kama unaishi chini ya kiwango Mungu amekukusudia? Na ukijua unaishi chini ya kiwango Mungu amekukusudia unafanya maombi gani ili uweze kuishi sawa na kusudi la Mungu?

Ubarikiwe Sana Sana!.